我的男性朋友 ~ 暢談女人篇




話說星期二晚,和日本朋友道別後,在下和幾個相熟的打機朋友在灣仔附近的西餐廳坐下吃晚餐,但這晚餐卻教在下感到很意外,內容竟然可以深入探討男女之間的想法及關係。

首先,介紹登場人物:

L君:當晚協助日文翻譯,留學外國多年,現為某機舖集團的太子爺,每天工作是巡視業務(即打機),當然有錢,也有女

A君:將和在下一起學日文的朋友,也是留學外國,現打理家族生意,一年工作三個月其餘九個月都清閒,極有錢,但冇女

J君:工作多年,每一份工都是靠人際關係吃飯,自然閱人/閱女無數,交際手腕超卓,當然有女,數量不清楚

K君:就是在下,沒有L君A君有錢及有國際視野,沒有J君的口才交際能力,唯一優勝之處是打機比他們強(這算什麼?!)


這是頭盤

四個男生,話題自然圍繞女生的問題。以下是節錄他們的部分對白:

L:即係呢,要溝女,最緊要果樣係「閒」

J:冇錯,最緊要係俾到時間同心機,錢反而唔係咁重要,夠養得起自己之餘又洗到些少錢係條女身上就得啦

L:我呀,以前讀書果時,有個同學,樣麻麻又老土,成日俾人「恰」,但係之後成日都去蒲Bar,結果又俾佢執到唔少喎!而家我見到佢,都會仲覺得「憑你?得唔得呀?!」,所以呢,肯俾心機俾時間,根本唔驚冇女o既!

A:我都有個Friend呀,佢以前好乖得一個女朋友,拍左好耐拖之後散鬼左,佢走左去三藩市,點知近排佢打電話黎,同我呻,話「A君,我覺得真係好唔掂,搞到自己好似隻鴨咁,晚晚唔同,點算呀?」我即刻Cup佢線!

J:係,我都覺,無論點樣唔識溝通點乖都好,肯放時間落去一定有回報o既。不過聽人講過,男女之間o既收入比例,最好係2:1,咁係最Perfect最少爭拗o既

K:不過落Bar真係唔係好岩我,洗o既錢都唔係問題,係Skill o既問題,例如猜枚唔得o既,D女見到你唔掂就唔同你溝通啦

L:你要明白,其實落去打獵o既,唔只係男,女o既都係一樣o既。你睇下果D Bar,一個Drink平則五十八十,都一樣越開越多,自然係有佢生存得到o既原因o既

J:都係果句,肯俾時間就得,我都有Friend逢一三五都落去劈,星期二四六就放工即番屋企補眠,錢唔係多,一樣係咁搵到食

L:K君,所以你真係唔駛驚,俾你條件更衰o既而有著落o既我都識好多。同埋你都知,香港係一個男女比例失衡o既地區,港男又越黎越多番大陸娶老婆,佢地每娶一個香港又多個女仔遇難啦。講驚,D女驚過你啦!

J:同埋男人真係可以擺得耐D,到左40歲一樣有市場,女就唔同,廿頭都會去玩去蒲,到左廿尾就會想要番D安全感,會開始對搵個長遠o既結婚著急,所以要急果個都唔係你啦!

L:不過呢,你做野同打機識唔到又真係死症,冇得救。講起打機,果隻……


之後,大家的話題就漸漸轉回打機之上,相信大家對這些都沒興趣,也不提及了。

而晚餐方面,每人消費約一百元,以食品的質素及環境來看,只算不過不失,故此也不作推介,大家看相片自行幻想吧。

一直以為,在下的打機朋友,對於這些男女事項都是無甚意見,甚至是無欲無求的,經過這一晚之後,發現原來也有例外的,意外的找到一個可以聊得高興的組合,結果是聊到打烊再轉戰附近的Cafe繼續。

他們各有比在下優勝的條件,當然不愁沒女。不知道他們對在下說「不用著急」,是基於他們擁有的條件,還是真的站在在下的立場去說,但無論如何,也讓在下好像有點過熱的心冷卻了一下。所謂欲速則不達,還是不要太著急比較好。

至於他們的觀點,只代表他們自己的意見,與在下無關,有任何投訴反對,不要找在下悔氣! 


A君的新玩具,價值5萬多元的MAZDA ROADSTER MX-5,打算玩三個月就換。
他沒女友的原因是要看清女生不是為了他的錢而接近,多豪華的原因……



     

發表留言



瀏覽次數:1,320  |   文章分類: 愛情見解  加入書籤: 永久連結